Aristoteles lo a bisa: “ut sciat omnis lex” Fayo di konosementu di lei a stroba naturalisashon di muhé kolombiana

WILLEMSTAD. Riba un otro pagina dje edishon aki nos por tuma nota kon di un manera desafortunado un muhé kolombiana di 27 aña a faya su papelnan di naturalisashon kasi-kasi manera ta un konspirashon di sirkunstansia tabatin pa e no haña e naturalisashon.
Esei ta un argumento pero otro argumento ta ku falta di aplikashon i konosementu al dia di regla i leinan di naturalisashon tambe a pone ku e desishon a kai nèt ne banda robes dje kandidata. E promé faktor ku a blòkiá su naturalisashon ta ku despues ku e abogado a pèrdè e kaso den promé instansia, ela apelá pero su apelashon a drenta Korte lat i ela keda outomatikamente deskalifiká.
E mester a drenta seis siman despues dje veredikto den promé instansia pero esei no tabata posibel pasobra ‘Los Dioses de la Naturalisacion’ (sic!!) no tabata na su fabor den e intento aki.
Abogado dje kolombiana a argumentá ku ela haña e veredikto “…kasi te fin di mei…” pasobra pa motibu di pandemia e tabata traha na kas i un biaha pa siman tabata buska su kartanan na kantor (Korte no tabatin e-mail via internet????).
E segundo argumento kasi kèns ta ku e muhé i su abogado te dia 27 di mei di aña pasá a haña kontakto ku otro pa motibu di Lockdown! (Lockdown tabata di 7’or di anochi bai su siguiente mainta pero den dia mester por a hasi kontakto).
Te anochi di 27 di mei e abogado a manda e apelashon kua un e-mail ku la haña riba internet pero ne momento ei tabatin un diferensia di 5 ora i ofisinanan di Sekretario di Estado tabata será! O sea, e no tabata sa ta kon e mester a fail e apelashon!
Ta su siguiente dia 28 mei 2020 e abogado haña sa via telefon kon e por a fail e apelashon i na unda i ela hasié e mesun dia korektamente ounke mester bisa ku tabatin Pandemia i tabatin diferensia di ora entre Kòrsou i Ulanda.
Wes tabatin komprenshon pa tur esei pero e fayo monumental dje abogado mes ta sinta den e hecho ku lei ta bisa klaramente ku no por manda un apelashon via e-mail!
Pa kompletá obra, e abogado a bisa wes ku e no ta kòrda presis ki dia ela mira e veredikto i te pa ela tuma kontakto ku e kliente, a pasa algun dia.
Pero ya e kaso a drenta fase di “the gangster that could not shoot straight” pasobra e no tabata sa mes ku e por a apelá Pro Forma. I esei sí wes no a pordoná pasobra e tabata den zona di offside dia bieu kaba.
Summa summarum, e muhé kolombiana a bira viktima di un kombinashon di sirkunstansia ku ta praktikamente eror humano pero wes a uza e kaso pa splika e abogado i su kliente kiko ta moraleho dje kaso.
Sòru pa for di awor registrá e adrès i datonan dje muhé kolombiano korektamente na Kranshi dado kaso e hasi un petishon nobo pa Naturalisashon.