AQUALECTRA TA KUMINSÁ PRODUSÍ I DISTRIBUÍ ‘SECOND GRADE WATER’

Willemstad – Aqualectra i Aqualectra Multi-Utility (AMU) huntu a disidí pa krea un dimenshon nobo den produkshon i distribushon di awa na Kòrsou.
AMU a tuma e operashon di un planta pa produsí ‘Second Grade Water’ i Van der Valk Kontiki Beach Resort Curaçao a akordá pa kumpra e awa aki serka AMU.
Ku esaki AMU i Van der Valk Kontiki Beach Resort Curaçao ta dal paso importante den nan esfuerso pa kontribuí na un forma signifikativo pa Kòrsou hasi bon uso di su rekursonan limitá na un forma duradero riba un manera ku ta benefisiá tur dos partido.
Kòrsou te ainda ta konosí pa su awa puru, kristalino i di kalidat haltu ku kada un por bebe direktamente for di kranchi.
Sinembargo aktualmente e mesun awa aki ta keda usá pa propósitonan kaminda no nesesariamente mester di awa di e mesun kalidat, kual ta usonan sekundario di awa manera pa awa di pisina, pa flush toilèt, laba outo òf pa mantené hardín di entre otro kasnan, edifisionan komersial òf hotèl.
Ku mira riba e nesesidat di awa pa uso sekundario, AMU lo bai produsí i distribuí ‘Second Grade Water’ pa klientenan komersial i pa uso na área públiko den e área di Bapor Kibra i e playa públiko na Mari Pampoen.