AQUALECTRA I FUNDASHON D-TAP TA UNI FORSA AWA I IMPORTANSHA DI KONSUMO DURADERO

Willemstad – Kòrsou semper tabatin un produkshon di awa kristalino ku ta sali for di nos kranchinan. P’esei ta importante pa sigui konsientisá nos hóbennan di e importansia di nos awa i tambe hasi e hóbennan konsiente di konsumo di awa na un forma saludabel, responsabel i duradero.
Ta ku esaki na bista Aqualectra i Fundashon D-TAP a sera un akuerdo di koperashon pa huntu trese e konsientisashon akí serka nos hóbennan.
CFO di Aqualectra N.V., señora Neysa Isenia, i señora Lara Melkert, Presidente di D-TAP Foundation, a firma e akuerdo di koperashon.
Aqualectra, durante di e periodo di kolaborashon ku D-TAP, lo enfoká primordialmente riba hóbennan ku ta bai skol, pa trese e konsientisashon mas serka di nan.
Pa esaki lo inisiá un kampaña di konsientisashon, i alabes lo hasi uso di e bòternan duradero ku D-TAP ta konosí p’é.
Di e forma aki Aqualectra i D-TAP ta traha na un forma dirigí pa halsa konosementu tokante di historia i produkshon di nos awa.
Miéntras tantu ta stimulá hóbennan pa tin un habito salú di bebe awa konsiente i hasi uso di medionan duradero ku ta yuda konservá nos medio ambiente.
Kòrsou tin un historia riku di desaliñashon di awa. Awendia Aqualectra ta usa teknologia pa kada dia di nobo keda ofresé nos komunidat awa fresku.
Ta importante pa na un forma dirigí eduká nos hóbennan di esaki.
Na mes momentu ta importante tambe pa hóbennan atkerí habitonan ku ta kontribuí na un bida salú i ku ta yuda na konservá e rekursonan limitá ku mundu ta ofresé nos.
Ta nétamente e elementonan aki a krea e nesesidat pa e kolaborashon entre Aqualectra i D-TAP. Miéntras ku Aqualectra ta produsí i distribuí nos awa, D-TAP di su parti, huntu ku su partnernan, a bin ta konsientisá gruponan den nos komunidat i bishitantenan di e importansia pa loke ta trata konsumo di awa na un forma responsabel dor di uso di por ehèmpel bòternan duradero i bunita diseñá.
E programa ku Aqualectra i D-TAP lo realisá lo kuminsá na inisio di próksimo aña eskolar.