Apesar di no tin e mes velosidat di ántes: Chris Sale hasiendo e trabou pa Red Sox…

E lansado slengu veterano di Red Sox Chris Sale ku tabata un pitcher semper di tremendo velosidat ayera a demostrá ku e por gana pa su tim sin tin di tira duru.
Sale a guia Red Sox na un triunfo di 7-1 riba e tim di Orioles.

E la saka 10 di su 15 outnan via roling.

Di e 90 aperturanan di Sale ku Red Sox, ta apénas di 4 biaha ku e la haña 9 out mediante roling.

E la tira 79 bala, apénas 4 biaha e batidónan a swing hera, i únikamente e la poncha 1 batido.
Faltando 13 wega pa hunga, e tim di Red Sox su rekòrt ta di 84-65.
Nan tin e promé “Wild Card” den Liga Amerikana.

Matt Barnes ku ta relevista di e tim di Red Sox a bisa ku e ta disfrutá di Sale. “Sale tabata great awe, e ta great semper”, asina e closer a deklará.

Renfroe a empuhá 3 kareda, i Dalbec tabatin un homerun. Alex Verdugo a bai di 4-3, ku 2 anota den e wega.