Apesar di defensa vigoroso: Fiskal a pidi kastigu di prizon pa trafikantenan di ser humano

WILLEMSTAD. Abogado di restorant di pizza Abogado señora mr. Alicia Blonk na defensa di Jamiele Augusta a insistí ku hopi di loke a bini padilanti di parti di e kolombiano ilegal i òf Ministerio Públiko ta puru mentira, anto ku e hòmber mes tabata pidi pa traha oranan largu.

Abogado mr. Alicia Blonk a bini bastante largu na palabra pa mustra ku Jamiele Augusta (landsreshèrshi) di ningun manera no tabata di mala fe.
Abogado mr Marije Vaders a konsentrá pa mustra ku su kliente Harvey Bernadina na numeroso okashon tabata kier a yuda e hòmber i tabatin oido pe, di manera ku por a manda plaka pa esaki su famia na Colombia.
E akusado Harvey Bernadina no tabatin ningun pasado ku hustisia i sigur no tabatin ningun mal intenshon ku Parra Sandoval, tabata énfasis di abogado Marije Vaders su defensa.
Abogado señora Atena Sulvaran tambe a yama atenshon pa e situashon doloroso i penoso ku strañeronan ta aden i ku tin biaha ta nan mes ta pidi pa trabounan ku ta bira di mas.
Señora Denise Augusta Velder, kende ta e kliente di abogado Atena Sulvaran ta konsiente di e realidat ei i pa tal motibu ta kai na pena di su hendenan i mas bien ke sirbi nan di yudansa.
Fiskal mr Emma de Groot finalmente a demandá komo kastigu pa Jamiele Augusta pa sak’é for di e funshon di Landsreshèrshi pasobra ku esei klaramente el a tacha nòmber i imágen di e funshon.
Mas aleu segun e fiskal Jamiele Augusta mester haña un kastigu di 20 luna di kua 5 luna kondishonal, kitando e 4 lunanan ku el a sintá kaba den sèlnan na Barber, mas e periodo di prueba di 2 aña.
Pa e akusado Denise Augusta Velder un kastigu di prizon di 18 luna di kua 6 luna kondishonal i un periodo di prueba di 2 aña. Pa e akusado Harvey Bernadina un kastigu di prizon di 12 luna di kua 4 kondishonal i un periodo di prueba di 2 aña. Pa Julio Lijfrock, kende aktualmente ta biba na Ulanda, trahando komo shofùr di karga un kastigu di trabou di 240 ora i 6 luna kondishonal.
Tambe fiskal a bai di akuerdo ku e suma di 18. 924 florin ku a pidi pa daño i perwisio. Wes mr. G. Verbeek a keda ku dia 3 di yüni lo sera e kaso ofisialmente i pa dia 11 di yüni dikta sentensia pa 2or di mèrdia.