Aparte di purba mata hende….. Kurasoleño loko di remate na Ulanda kier a sende supermerkado na kandela

WILLEMSTAD. Djaweps ultimo un tribunal na Den Haag a kondená un Kurasoleño ku trastorno mental asina grave ku por kalifika su kondishon komo loko di remate.
Nos lo yama e akusado ‘Chebu’ pa no revelá su identidat pasobra na final e no a haña un kastigu penal.
E kondena tabata pa sera Chebu den un instituto pa kondenadonan pe haña tratamentu pa tempu indefini pasobra ta dudoso ku un dia e lo por komportá normal atrobe.
Wes a apsolvé Chebu di tur persekushon penal pero alabes a dikta ku e no por sirkulá mas den sosiedat despues ku ela purba sende un supermerkado na kandela i a purba hinka hende mata tres biaha riba mesun dia.
Den pasado korte a yega di dikta medida di ‘ter beschikking stelling’ ku tratamentu obligatorio pero esei no a duna resultado.
Ta trata di un kurasoleño di 44 aña ku ta será kaba den prizon na Westzaan.
Dos siman pasá wes a trata e kaso i a dikta tratamentu ad infinitum.
Tabata dia 2 di desèmber 2020 ku e homber a ataká su viktima ku un machete pa atrak’é i a logra hink’é na su gargante.
E dia ei ela sende un kandela intenshonalmente den supermerkado Albert Heijn na Grote Marktstraat 5, tirando un bòm Molotov meimei dje supermerkado
kreando peliger di morto serio pa e publiko presente.
E mesun dia ela ataká un hende ku machete riba kaya.
Despues ku polis a aresté, e sikologo ku a eksaminá su kabes a raportá ku ela ninga di kopera ku e eksaminashon i tabata mashá emoshonalmente kargá i deskonfiá den su manera di papia i aktua.
E ta hende ku ta sufri di skizofrenia i tabata usa remedi pero a stòp di hasi esei.
E sikologo sí a logra komunika ku e homber pero a konstatá ku ta kasi pèrdí.

Den mente un empleado marokano dje supermerkado lo tabata bin su kas pa hòrta su kosnan i molesti’é i ku e dia ku ela bira loko, e marokano lo a hòrta su skeiru di djente i a laga kokaina atras pe usa.
E sikologo a rekomendá e wes pa never mind tratamentu dje kaso pasobra no tin sentido.
Esei ta nifika ku pa lei e homber no ta responsabel pa su hechonan.
Konsekuensia di su kondishon mental ta ku ela puñalá dos empleado di Albert Heijn na Den Haag i a dal un otro ku machete den kabes i ta suerte e viktima tabatin ku e no a kap su kabes.
Un di su viktimanan a resulta te den kuido intensivo.

KANDELA INTENSHONAL
E dia ei ela bai e supermerkado ku un bòter di gasolin i a traha un bòm Molotov ku ela sende na kandela yenando e lugá tur na huma pretu.
Pa esaki tambe a apsolvé.
E akusado mes no ta konsiente ku e ta malu di kabes i ke bin Kòrsou mas rapido posibel. Esei e por bien lubidá pasobra no por lag’e lòs meimei di hende den un avion.
Pa siguridat di su ambiente i otro hende no a keda nada otro sino di ordená pa hink’é den un klinika kaminda tin siguridat pisá pasobra tur e biahanan ku ela yega di haña tratamentu den klinika ela sali komportando su mes pió.

KOMPENSASHON
NA VIKTIMANAN
E kurasoleño por a keda apsolvé di kastigu pa su delitonan pero e daño material i kompensashon di pena sí e tin ku paga kon ku sea.
Un dje viktimanan a demandá pago di € 3.794,10 na daño i perwisio ademas di € 794,10 na daño material i € Hasta un T-shirt di 20 Euro e tin ku paga bèk.
Si e no paga e daño perwisio, e ta kai será den prizon pa 44 dia despues ku e tratamentu ad infinitum kaba.