Antilles Aerospace a hasi e trabou: Winshilt nobo pa TUI

WILLEMSTAD – E siman aki Antilles Aerospace, un empresa kalifiká pa hasi trabou di mantenshon na avion, a realisá un enkargo realmente grandi na e aeropuerto internashonal Hato di Kòrsou. Ta trata di remplaso di un bentana di kòkpet di un Boeing 787 di e aeroliña TUI. Den buelo na kaminda di Boneiru pa Amsterdam e bentana a haña sker aden. For di punto di seguridat e ora ei e tripulashon di kòkpet a disidí pa bira pa bai Kòrsou pa e reparashon nesesario. P’esei a tene e avion na tera na Hato.
Ku avion e siguiente dia a trese un bentana nobo pa e téknikonan di Antilles Aerospace profeshonalmente kita e bentana di sker i despues monta esun nobo i seya esaki snòk-snòk. Pa esei nan a haña sosten di Miles Construction, ku a bini ku un kran pa hisa e bentana di 200 kilo te na e nanishi di e avion i ku koperashon di Curaçao Airport Partners. Pa duna un man TUI a manda dos funshonario pa bin Kòrsou.
Djarason atardi e avion por a kuminsá su buelo di regreso pa Amsterdam.

E pòtrètnan ta mustra kon staf di Antilles Aerospace tabata riba e trabou pa mas lihé posibel i na un manera profeshonal remplasá i seya e winshilt di un Boeing 787 di TUI.