Angelo di Torneo Omni: “No ta kos parotin”…

Ayera mèrdia Sr. Angelo ku a identifiká sumes komo dirigente di e torneo di sòftbòl Omni/FDDK a tuma kontakto ku 5 Star paso e no tabata muchu kontentu ku 5 Star a skibi dje “bululú” ku tabatin na Post-6 den e torneo Omni/FDDK.

Sr. Angelo a bisa ku nan a rabia paso nos a referí na e torneo komo deporte “parotin”.

E la splika ku nan tin 53 página di regla pa traha kuné.

E tin 7 aña den e organisashon i no por aseptá e palabra “parotin”.

Nos a splika Sr. Angelo ku e “parotin” ta paso no tin afiliashon na niun federashon deportivo.

E la desmentí ku tabatin machete riba tereno.

Na su opinion paso e tim di talentonan dominikano ta gana ta surgi tur e problemanan.

Tambe ku no tabatin niun problema ku umpire, paso ta nan mes ta dirigí e weganan.

Nos a puntra ku si no tabatin bringamentu ??

Sr. Angelo a bisa ku ta un hende a hasi sumes kulpabel di tur e problema.

5 Star a aserka tres persona ku tabata na Post-6, i nan a konfirmá ku loke nos a skibi ta korekto.

Si e palabra “parotin” ta hasi doló, sòri, nos sa tambe si, ku tin tim di deporte “parotin” ku kisas ta mihó organisá ku esnan ku tin afiliashon na kualke federashon.