Angelique Klooster ‘unplugged’ awe nochi serka Ruvette

WILLEMSTAD:- Awe nochi Angelique Klooster lo ta estilo ‘unplugged’ den un paréntesis spesial di e podcast di Ruvette Dirksz. E podcast lo ‘premier’ riba Youtube awe djaweps dia 28 di òktober, 7’or di anochi. E podcast lo ta primeramente dediká na e luna di Konsientisashon pa Kanser na Pechu. Manera tur hende sá, luna di òktober mundu henter ta uni pa krea un paréntesis riba ‘Breast Cancer Awareness’.
Ruvette Dirksz presentadó di e podcast, ta komentá ku e edishon aki ta totalmente dediká na inspirashon i pa duna forsa renobá na tur esnan ku ta den e proseso di rekuperashon. “Mi a pensa ku Angelique Klooster i su kansionnan ta perfekto pa e okashon… e nivel di entrega musikal di Angelique ta asina haltu, ku e ta brinda 30 minüt di reflekshon i introspekshon.
Enrealidat, e podcast aki ta pa tur hende ku mester di forsa nobo.”, esaki di akuerdo ku Ruvette Dirksz.