ReMa Uní ta bira más visibel den komunidat

WILLEMSTAD – E organisashon di representashon di mayor, ReMa Uni,ta haña hopi importante pa ta mas serka di komunidat i tambe esnan ku e ta traha pe. Ta pesei entrante promé di yüni próksimo ReMa Uní ta bai kuminsa drenta bario.
Asina presidente di ReMa Uni a splika. Mas den transkurso di tempu lo bai indiká ki día ta yega kua bario.
Lo bai aserká e diferente instansianan kaminda tin mayornan ta traha pa puntra pa akseso pa ReMa Uní duna presentashon kiko e representante di mayor ta para p’é.
E grupo ku ta bai kuminsa promé den dje ta e plataforma di sindikatonan pa asina por tene presentashon i wak kon pa sostene otro. Pa por wak kon i sí por kuminsa karga e gastunan huntu entre otro di foyeto informativo pa mayor.
Rekoudashon di fondo
Nouwels-Wieske a splika tambe ku entrante otro siman,
ReMa Uní ta bai kuminsa bende karchi pa rekoudashon di fondo pa asina por yega na sufisiente fondo pa por kubri gastunan di notario pa por adaptá e statutonan di tal manera ku mayornan individual tambe por bira miembro di e organisashon.
E rekoudashon di fondo lo ta konsisti di un desayuno sosial ku lo tuma lugá día 10 di yüli próksimo na patio Margaritha. E ta intenshoná tambe pa mayornan yega mas serka di RU pa asina nan indiká kiko ta nan interés, i na unda nan ta mira ku ReMa Uní por duna un man den dje.
Aparte ku lo bai bende karchi pa haña fondo, ta hasi un yamada na kualkier instansia òf organisashon ku ke hasi un donashon na ReMa Uní pa tuma kontakto ku ReMa Uní na number di telefòn: 5134214.

Aktividatnan
Na nóvèmber próksimo ReMa Uní ta bai kumpli 17 aña, pa motibu di e pandemia no por a selebrá en grande ReMa Uní su di 3 lustro. Segun e presidente di Rema Uni, den e temporada ei lo bai aserka Gobièrnu di Kòrsou ku 2 petishon pa loke ta trata mama i tata ku tin yu den enseñansa.
Lo ta bai tin aparte di treinin pa mayor, charla tambe na komienso di aña eskolar nobo pa duna mayornan konseho kon pa nan atende un tiki mas mihó ku nan yunan. ReMa Uní ta hasiendo e tramitenan nesesario pa bai traha den koperashon ku Bos di Hubentut pa asina por yega na un konseho di alumno/studiante den futuro serkano. Mester por yega den futuro na un plataforma di konseho ku ta konta riba partisipashon di e alumno/studiante tambe huntu ku e mayornan. ReMa Uní tin banda di su logo un dicho pa hala mayornan su atenshon, esaki lo bai kambia entrante e aña eskolar nobo di “Enseñansa garantisá ora Mayor tambe partisipá” ta bai bira:”Enseñansa garantisá ora tata i mama tambe partisipá!”.