Aña 2021 tabata un aña eksepshonal pa Fondo APC

WILLEMSTAD – Djawéps ultimo durante un enkuentro entre direktor i direktor athuntu di Algemeen Pensioenfonds van Curaçao (APC) respektivamente sra. Evelyn Kruithof-Bor i sr. Ramiro Griffith a hasi entregá ofisial di e kuenta i e relato anual 2021 di APC na minister di Finansa drs. sr. Javier Silvania, despues ku na fin di yüli 2022 ya a entregá esakinan na Ministerio di Finansa.
Ku esaki APC a kumpli ku e eksigensia di e “landsverordening APC” pa ratifiká e kuenta i relato anual di e aña anterior promé ku dia 1 ougùstùs di e aña kalendario.
Den e relato anual banda di duna un raportahe di e sifranan tambe ta mira bèk riba e desaroyonan di e akontesimentunan mas importante, ku a influensia e fondo di penshun durante 2021.
Aña 2021 tabata un aña eksepshonal.
Apesar di e impakto di e pandemia di Covid-19 riba ekonomia mundial, APC a sa di reforsá su posishon finansiero den aña 2021.
E grado di kobertura di APC tabata na final di desèmber 2021, 109,7%.
E pandemia un biaha mas durante aña 2021 a sòru pa un volatilidat ekstremadamente haltu riba e merkadonan finansiero internashonal.
E preis di akshonnan a konosé kaidanan fuerte, miéntras ku invershonaistanan a buska nan refugio den bono i oro.
E kaida di preis di petroli tambe a pone e merkadonan finansiero sakudí, miéntras Brexit i e guera komersial entre Merka i China tambe tabatin su influensia.
Kantidat di medidanan di stimulashon i paketenan di medida di emergensia ehersé dor di e banko sentralnan mas prinsipal (Fed i ECB) a keda tumá pa maneha e situashon finansiero pèrtá.
Esaki a trese trankilidat atrobe riba e merkadonan di akshon i na final di e di tres kuartal e bolsanan a krese fuerte bèk pa motibu di e alivio firme despues di a kita e ‘lockdownnan’, entre otro na Merka i Oropa, ku kontinuashon di e aktividatnan ekonómiko ku a kondusí na final di aña 2021 na resultadonan positivo riba e bolsanan mundial.
E pilanan importante di nos ekonomia ta bou di preshon.
Na aprel 2021 gobièrnu hañé obligá pa un biaha mas bolbe tuma e medida di ‘lockdown’ pa evitá un brote mas di e viro di corona.
Esaki tabatin konsekuensia pa e tráfiko aereo ku un impakto negativo riba e sektor turístiko.
Aktividatnan ekonómiko a para ketu en espera di e desaroyonan relashona ku e pandemia di Covid-19.
Durante aña 2021 APC a ankrá mas ayá su vishon stratégiko i e kaminda skohé pa ta mas inovativo, sólido, konfiabel i kapital fuerte di su modelo di hasi negoshi.
Durante e próksimo añanan APC lo keda ehersé su maneho sólido pa asina por atendé ku e retonan tantu lokal komo internashon na bienestar di su partisipantenan i penshonadonan.
APC ta mira dilanti i ta traha un fundeshi fuerte pa futuro!