Ami ta keda den kas

(Orashon durante lockdown)

Ami ta keda den kas, Señor!
I mi ta realisá di ku, esaki tambe, Bo a siña mi miéntras Bo tabata bibando, obediente na Tata, durante trinta aña den kas di Nazaret sperando e gran mishon.

Ami ta keda den kas, Señor!
I den e karpinteria di Hosé, bo wardadó i esun di mi, mi ta siña na traha, na obedesé, pa skür e rantnan brutu di mi bida i prepará un obra di arte pa Bo.

Ami ta keda den kas, Señor!
Ami sa ku ami no ta so pasobra Maria, manera kada mama, ta einan patras hasiendo e trabounan di kas i preparando kuminda pa nos, tur famia di Dios.

Ami ta keda den kas, Señor!
I di forma responsabel mi ta hasié pa mi mes bon, pa salú di mi siudat, di mi sernan kerí, i pa bon di mi ruman, esun ku Abo a pone banda di mi pidiendo mi pa vigilá pe den hardin di bida.

Ami ta keda den kas, Señor!
I, den silensio di Nazaret, mi ta trata di resa, di lesa, di studia, di meditá i ser útil ku trabounan chikí pa hasi nos kas mas bon i agradabel.

Ami ta keda den kas, Señor!
I mainta mi ta yama BO danki pa e dia nobo ku Bo ta konsedé mi, tratando di no nèk mi, di mi risibí ku asombro manera un regalo i un sorpresa di Pasku di Resurekshon.

Ami ta keda den kas, Señor!
I mèrdia lo mi bolbe risibí e saludo di e Angel, lo mi bira sirbidó pa amor, den komunion ku Bo ku a bira karni pa biba mei mei di nos; i, kansá pa e biahe, Lo mi topa Bo ku set serka di e pos di Yakob, i ku hamber pa amor riba e Krus.

Ami ta keda den kas, Señor!
I si atardi mi ta kai den gara di un poko di melankolia, lo mi invoká Bo manera e disípulonan di Emaus: Keda huntu ku nos, dia ta yegando na su fin; nochi ta sera.

Ami ta keda den kas, Señor!
I anochi, den komunion resando ku tantu enfermo i personanan ku ta nan so, lo mi spera e ourora pa bolbe kanta bo miserikòrdia i bisa tur hende ku, den tempestatnan, Abo ta mi refugio.

Ami ta keda den kas, Señor!
I mi no ta sinti mi mes so ni bandoná, pasobra Abo a bisa mi: Ami ta ku boso tur dia.

Sí, i prinsipalmente den e dianan akí di desamparo, Señor, den kua ku, si mi presensia no ta nesesario, lo mi alkansá tur hende ku e úniko alanan di plegaria.
Amèn.