Akusashonnan kontra di Usatis Revierre ta sin base

WILLEMSTAD. E siudadano Usatis Revierre di 43 aña di edat tabata den sala di korte ayera pa problemanan ku e tabatin ku algun bisiña.
Un grupo di persona di e mesun bario di e siudadano Usatis Revierre a hasi denunsia kontra dje, bisando ku dia 27 di ougùstùs 2018 el a manda outo riba un tal Celestijn ku e intenshon pa mata e persona aki.
Na e okashon ei Usatis Revierre lo a grita tambe ku machete den man bisando: “Mi ta mata bo”.

Mas aleu tambe tabatin e akusashon ku lo el a kibra glas di un vehíkulo.
E kaso a bini pa tratamentu dilanti wes komisario anteriormente i for di e momento ei a sali na kla ku nada di e akusashonnan kontra di Usatis Revierre no ta klòp, pasobra algun di e personanan ku a sostené e denunsia na promé instante, direpente a hala patras, bisando ku nan no sa di nada, ta únikamente un solo persona a instigá nan pa hasi denunsia, pero ku nan mes no tin prueba di nada.
Ayera den sala di korte, fiskal mr. Emma de Groot a sali bisa ku e kaso no tin ningun base, komo tal no tin ningun akusashon kontra di Usatis Revierre.

No tin kuestion di menasa, intento di asesinato ku outo, ni ku zuaimentu ku machete, tampoko kibramentu di glas di un vehíkulo, pues e siudadano Usatis Revierre por a regresá su kas trankil.