AKUSADO U. PINEDO DEN SALA DI KORTE AKUSÁ DI A TRANSPORTÁ 166 KILO di KOKAINA (DROGA).

WILLEMSTAD.- Parse ku intentonan pa pasa droga ta na órden del dia atrobe. Ayera entre e kasonan di mulanan ku a purba pasa droga tabatin, e akusado U.Pinedo, kende tin 53 aña di edat. Ta trata aki di un intento pa pasa 166 gram di kokaina den dos pochi di produkto pa kabei. E akto kastigabel aki a tuma lugá dia 26 di febrüari 2022, pero outoridatnan a interseptá e akto kastigabel di manera ku prosèsverbalnan a indiká ku riba e dia ei e tabata biahando pa Ulanda.
Remarkabel ta e hecho ku e akusado a presentá sin abogado. Pero, djis despues ku fiskal a trese e akusashon dilanti, e akusado a rekonosé ku ta bèrdat e akusashon di fiskal. Segun e deklarashon di e akusado U. Pinedo, un otro persona a pidié pa hasié un fabor. Mas aleu segun U.Pinedo, e kosnan tabata asina original,ku e no a pensa ningun momento so ku lo por tabatin algu robes ku e pochinan.

Segun e akusado, p’esei el a tuma e pochinan tira nan den maleta su maleta numa.
Ku hopi konvikshon U. Pinedo a trese padilanti ku e ta traha karpinté i gana su bon entrada,komo tal e no tin ningun motibu pa mete ku droga, e tipo di aktonan ei no ta pe.

Sospecho fuerte a lanta for di e momento ku durante di opservashon di outoridatnan (miembronan di duana) a ripará ku e akusado tabata aktua basta nèrvioso den e rei pa hasi kòntròl.
Pues tabata rason pa laga saka U. Pinedo for di rei pa hasi un kòntròl mas rígido i profundo.

Mesora ku a habri U. Pinedo su maleta, e personal di duana a reis riba dos pòchi di produktonan di kabei. E pòchinan tabatin un peso ku no ta normal. Pa tal motibu a disidí ku ta bora ámbos pòchi. Resultado di e intervenshon di duana ta BINGO, pasobra a saka un puiru koló blanku ku un holó basta fuerte, di manera ku e supstansia aki a resultá di ta kokaina.
U. Pinedo a bisa ku e tabata bayendo Hulanda serka su kasá i yunan.

Mas aleu U. Pinedo a sigui konta ku na vispera di su biahe pa Ulanda, un tal Kelvin a pasa hasié un bishita. E duo aki a para kòmbersá i finalmente a bisa Kelvin ku U. Pinedo ta bayendo Ulanda serka su famia.

Manisé, na momento ku U. Pinedo tabata drechando su maleta, un outo a para pita na su kas. Segun e akusado U. Pinedo, tabata trata di un mucha muhé ku ta papia spañó, ku a baha for di e vehíkulo i a bisa ku Kelvin a manda esakinan pe i ku e petishon pa hasié e fabor pa hiba Ullanda, paso el a lubidá nan na Kòrsou.
Mas aleu, segun e akusado, el a tuma e pòchinan ku tur konfiansa i tira nan den maleta, pasobra e no a diskubrí apsolutamente nada straño na e pochinan. Pero djei nunka mas el a tende algu di Kelvin.
U. Pinedo a duna di konosé ku e ta suponé ku Kelvin mes lo a bin tuma e produktonan serka dje na Schiphol.
Wes a mesora a indiká ku na aña 2003 tambe e akusado aki a kai será pa 15 luna komo ku el a violá e lei di opio. E suseso di aña 2003 outomátikamente a tira un otro lus riba e situashon di e akusado U. Pinedo.
Fiskal a haña e akusashon probá i a hasi e demanda di 3 luna di kastigu di prizon kondishonal mará na 3 aña di prueba.
Na final e akusado a ekspresá di ta konsiderá su mes un di e mihó karpinténan di Kòrsou i pa tal motibu e no tabatin ningun rason pa pasa droga.
Ta hende a hink’é den e kos aki kontra su deseo. E sigur no ta siudadano ku mester hasi e kosnan aki.
Segun e akusado, e kos a aki a duel e masha hopi mes, paso e no mester a bai asin’aki. El a pidi pa e no bai prizòn mas. Wes na final ta haña e akusashon legalmente i konvinsentemente probá i ta bai di akuerdo ku e demanda di final. U. Pinedo a bisa ku hamas i nunka lo mira su kara den sala korte.