Aktor Paul Rudd skohé e hòmber mas sexy 2021 pa revista People

New York – E revista People a skohe e aktor Paul Rudd komo e hòmber mas sexy di aña 2021. Ku e skohensia aki Paul ta kita e puesto ku Michael B. Jordan tabata okupá.
E aktor di 52 aña, kabeinan kolo skur, un poko barba na kara i wowonan bèrdè ya tin diferente aktuashon den pelíkulanan. E ta konosí pa su ròl den entre otro “Night at the Museum”, “The 40 Year Old Virgin”, “Ant-Man”, i “Clueless” por ehèmpel.
E aktor i komiko a keda sorprendé pa e nombramentu i no por kere e distinshon. “Tin asina tantu persona ku meresé e título aki mas ku ami”, asina Rudd a splika durante un entrevista ku e revista. Paul Rudd ta spera ku awor ku e tin e título e tambe haña tur e invitashonnan sexy manera den kaso di George Clooney, Brad Pitt i Michael B. Jordan.

For di 1985 e revista merikano People ta skohe ‘Sexiest Man Alive’ ku den nan mayoria ta bai na personanan konosí. Mel Gibson tabata e promé i ku tempu diferente otro manera John Legend, Idris Elba i Blake Shelton tambe a disfrutá di e título. Aktornan manera Brad Pitt, Johnny Depp, George Clooney i Richard Gere tabatin mas suerte i a logra e título di ‘hòmber mas sexy’ na kuater okashon kada unu.