Akountent a indiká…. Gerensia di CMC mes tin insiguridat den futuro

WILLEMSTAD. Gerensia i direktiva di CMC di un manera ku no ta laga duda a manifestá nan falta di un konfiansa duradero den CMC ku frasenan ku ta papia palabra kla: Si no haña solushon pa e problemanan finansiero di CMC den futuro serkano, e proyekto ku un tempu a keda promové komo un hospital modernisimo pa hopi aña binidero ta kore rísiko di bira un skelèt ku a guli desenas di mion di florin sin kumpli ku su meta.
Un hospital ku tin futuro nan a yama ‘going concern’ pero e palabra duda den un going concern a kai demasiado biaha for di skina ekspertonan ku a hasi un resúmen di loke a logra te awor aki ku e hospital nobo.
E firma mundial di akountent a hala atenshon speshal riba e duda riba vitalidat dje hospital a base di sifras ku gerensia di CMC mes a prepará.
E kondishon aktual ta indiká eksistensia di un insertidumbre i un material ku ta krea duda grandi riba kapasidat dje hospital pa sigi vital.
Gerensia di CMC a señalá ku e situashon finansiero aktual ta importante pa haña un solushon integral i permanente pe retonan finansiero ku CMC ta enfrentá.
Sinembargo kontinuidat di kuido médiko ta importante i mester ta garantisá pasobra HNO Exploitatie ta e úniko hospital na Kòrsou ku por duna kuido den un hospital moderno na Kòrsou.

INISIATIVA PA
SOLUSHON
PERMANENTE

Manera e firma di akountent a skirbi riba e pasonan ku ta tumando pa salba e hospital tin diferente medio pa logra un solushon permanente den e lunanan binidero.
Pero si no haña un solushon, kapasidat di CMC pa sigi komo un proyekto sano ta na peliger.
I e akountentnan di BDO no a kambia di opinion riba e tema aki.
BDO a ripití den e rapòrt ku CMC a revelá awe mainta ku nan no a duna un opinion definitivo riba e sifranan anual di 2019 fechá dia 30 di Yuli aña pasá.