Aki un luna na Ulanda: Korte lo trata apelashon di ‘Cuchi’ kontra bida largu!

WILLEMSTAD. Aki un luna Korte di Hustisia na Amsterdam lo trata e kaso di apelashon dje kriminal i asesino múltiple Kathron ‘Cuchi’ Kathron original di Grenada pero ku pa años tabatin su teritorio pa kometé su krimennan kontra bida di hende na Sint Maarten.
Hustisia a duna e kaso e nòmber kódigo “Mars”.

Medionan di komunikashon ku registrá na Ministerio Publiko na Kòrsou i Sint Maarten lo por sigi e kaso Mars via konekshon di video ora trata e kargonan kontra e akusado Kathron ‘Cuchi’ Fortune.
Korte di Hustisia a disidi ku pa tende e akusado ta nesesario pa tende e kaso na Amsterdam ounke ofisialmente ta den Korte na Sint Maarten normalmente e lo a tuma lugá.
E kaso lo tuma lugá den korte na Amsterdam, IJdok 20, 1013 MM.
E promé dia di seshon lo ta djarason 1 september i djaweps 2 september.
E orario lo ta 3.30 PM ora lokal na Kòrsou.
No ta konosí ku si siudadano komun tambe por haña un lenk pe konekshon di video ora e seshon ta andando pa garantisá ku e seshon ta publiko.
Interesadonan por mèldu na e adrès: ondersteuning.sxm@ caribjustitia.org pa mas tardá djabierne 27 di ougustus 4’or pa risibi e kódigo ku kual nan por konektá ku e sala di korte.

KEN TA ‘CUCHI’
Kathron “Cuchi” Fortune ta un kriminal pisá ku a mata sigur un hende pero posiblemente mas pero ku hustisia no por a proba.
Na aña 2006 Cuchi a mata e Rubiano Erwin Margarita pa kual ela haña un kondena di 21 aña. Den su karera kriminal ela yega di hui i nan a traslad’é pa Kòrsou tambe pa un periodo.
Hustisia ta sospechá Kathron di violashon i asesinato di un muhé franses poko despues dje asesinato di Erwin Margarita pero pa falta di prueba no a kondené.
Dia 16 di februari di 2016 Cuchi a hui for di konsultorio di dokter na Sint Maarten i ela eskivá outoridatnan durante seis luna ora a arest’é na St. Kitts.
Durante ku e tabata liber e lo a kometé of partisipa na dos asesinato. Un di nan ta riba e homber ku lo a violá su yu muhé menor di edat na Sint Maarten.
Den e tempu ei orkan Irma a pasa riba Sint Maarten i muraya di prizon a basha den otro i no por a garantisá ku por a tene Cuchi i nan a traslad’é pa Korsou.
Dia 19 di september 2017 ela yega Kòrsou bordo di un avion militar ulandes.
Dia 5 di yuni di 2019 korte a kondená e kriminal na kastigu di bida largu pa asesinato.

A arestá e kriminal despues ku dos homber latino Sarante Diaz i Rosario Contreras a disparse na Sint Maarten dia 5 di desember i outoridatnan a inisia proyekto MARS pa buska nan.
Durante e investigashon un dje sospechosonan a mustra reshèrshe unda nan a tira e kadavernan den laman na Simpson despues di a mata nan den un kamber di Simpson Bay Resort pero nan a haña nan te ougustus di 2017.
Kathron aktualmente ta será den un prizon di maksimo siguridat na Amsterdam pasobra ela hui for di prizon na mart di 2016 ora e tabata sintando 21 aña di kastigu pa asesinato di Margarita.
Korte a haña ku e ta un peliger pa sosiedat i ku e mester keda será pa resto di su bida na Ulanda.
Su ruman tambe a haña kastigu di 30 aña di prizon pe dòbel asesinato ya ku ela yuda planeá i ehekutá e asesinatonan.
Un otro persona ku a yuda nan trasladá e dos kadavernan for di kamber di hotel a haña 9 aña di kastigu.
A tuma polis dos aña pa resolvé e dòbel asesinato pero porfin a skapa Sint Maarten for di un homber peligroso.