Akademia Di Baseball Brievengat i Royal Scorpions: Ta Felisitá Nair Jamanika ku ta bai The Kings Academy…

Nair Jamanika un hóben ku a kuminsá hunga baseball promé den Organisashon Tra’i Seru i despues pasa pa Akademia di Baseball Brievengat i tambe hunga den e organisashon di Royal Scorpions ta bai sigui su skol i hunga su baseball na Estádos Unidos.

Jamanika ta bai The Kings Academy na Tennessee. Posiblemente e lo sigui den outfield, ounke hungando pa Brievengat e la hunga práktikamente tur posishon, makisimo dirigente di Akademia di Baseball Brievengat Ernst Meyer ta splika.

Den kombersashon ku deporte 5 Star ‘Coach’ Ernst Meyer a bisa ku Nair Jamanika ta un tremendo pelotero ku hopi disiplina.

E ta kore bon, bati bon i ta tira bon.

Na 2016 e la hunga Serie Mundial di Little League. Jamanika resientemente tabata na Aruba kaminda e la hunga den un torneo pa 1 luna.

Tantu Akademia Brievengat komo Royal Scorpions ta gradisí Nair pa e tempu ku e la hunga pa nan, i ta deseá Nair tur klase di éksito na skol na Merka den baseball i den su estudio.