Ainda no tin solushon pa problema na servisio di ambulans

WILLEMSTAD – ABVO a sali e reunion ayera tardi ku mediado di gobièrnu tokante e problema di desentralisashon di servisio di ambulans, ku sentimentu miksto. Asina Kenneth Bremer, di direktiva di ABVO a bisa. Bremer no ta mira avanse den e diskushonnan. Gerensia di Fundashon Ambulans Kòrsou ta keda para riba su puntonan, mientras ku e dos sindikatonan ABVO i CBV ta mustra nan punto di bista, ku ta diferente.
E lider sindikal a menshoná tambe ku durante dje reunion gerensia di FKA mester a sali pura pa atende problema di hospital. Esaki ta lanta pregunta serka ABVO si tin sufisiente ambulans pa duna servisio. Segun Bremer ta tirando falta riba e personal, pero e sindikato ta puntra si tin sufisiente material pa e personal traha kune. Esei ta un dje puntonan ku e sindikatonan ta trese dilanti, pero ku nan no ta hanja kontesta riba dje.

CBV
Sindikato CBV ta riba mesun linja ku ABVO pa loke ta trata e situashon na servisio di Ambulans. Annaliza Mathilda, presidente di CBV tambe a bisa na final dje reunion ayera tardi ku e partidonan no ta yegando na un entendimentu ni tampoko aseptashon.
Segun Mathilda, e sindikatonan ta pidi indulgensia pa e partidonan sinta huntu pa atende e problemanan, e pro i kontra di desentralisashon di e servisio. Pero kada bes, ta bin dilanti ku di parti di gerensia, nan no ta basha awa den e biòa. Tambe e presidente di CBV a menshona ku e no ta kalifiká e situashon na Servisio di Ambulans, komo un di konflikto. Ta simplemente e partidonan mester hanja oportunidat pa sinta ku otro ku e meta pa diskuti dikon si òf dikon nò, mester sigi ku e sistema manera e ta aktualmente na servisio di ambulans. Mathilda tambe a referi na e supuesto skarsedat di ambulans, loke ku ta hasi trabou dje trahadó di ambulans más difisil. Aktualmente e ambulansnan ta sali for di Zakito, kaminda ku e material ku nan tin ta disponibel
Despues dje reunion di ayera, CBV a disidi ku e ta bai bèk serka su miembronan, pa informá nan ku e partidonan no ta yegadando na un akuerdo .
Promé ku e miembronan di e sindikato kuminsa hasi e parti ku ta eksigi di nan, tur kos mester ta reglá korektamente. Asina por konklui for dje deklarashonnan di e presidente di CBV.