AGKK ke reuni pa kuminsa traha riba planifikashon posibel selebrashon 2022

Después di deklarashon di minister presidente Eugene Rhuggenaath di djasabra último nos di direktiva di Asosiashon di Gruponan di Karnaval Kòrsou (AGKK) a wordu aserka pa diferente karnavalista i tambe lidernan  di grupo di karnaval ku e pregunta ku selebrashon di karnaval 2022 lo por tuma lugá den su forma original.

Minister presidente Eugene Rhuggenaath a deklara ku entrante djamars 11 di mei eventonan na airu liber ta posibel pa mucha i hóbenan te ku 18 aña. Por lo pronto e eventonan aki mester tuma lugá sin presensia di públiko.

Tambe e minister a anunsiá ku djamars 11 i djabièrne 14 di mei próksimo lo bai tin un Asamblea Nashonal Bibando. Diferente gruponan di enfoke i interes lo wordu invitá pa forma parti di un kombersashon, un diálogo pa krea perspektivanan nobo.

Teniendo na kuenta ku parada nan di karnaval ta tuma lugá den airu liber i alabes di e splikashon duná dor di minister presidente Eugene Rhuggenaath di djasabra último, nos por dedusí, ku gobièrnu, ekspertonan i gruponan di interes konhuntamente por yega pa krea un perspektiva kaminda nos ta bai biba un bida mas normal atrobe.

Direktiva di AGKK proksimamente lo yama un reunion di miembresia general (teniendo debido kuenta ku reglanan di mantenshon di higiena i sufisiente distansia fisiko). E reunion aki lo bai ta unu krusial i hopi importante pa por planifiká un plan bálido, basá riba konseho di gruponan di interes i reglanan ku gobièrnu stipulá pa’sina yega na un posibel proposishon pa loke ta trata selebrashon di nos fiesta di karnaval 2022.