ACU ku un struktura nobo di direktiva ta kla pa futuro

WILLEMSTAD. Ayera Koperativa ACU a tene reunion general di miembronan ku tabata parsialmente tambe kontinuashon di un reunion anterior ku mester a tuma lugá pero ku e pandemia a stroba balentemente stail di “two-in-one”.
E reunion a kuminsa dia 7 di mart dos aña pasá pero mester a para e reunion pa falta di tempu pero ayera a sigi i a termina mèrdia.
A trata e relato finansiero riba 2020 den presensia di 151 miembro.
RESULTADO POSITIVO
Di akuerdo ku e direktor su relato, ta di vital importansia pa direktiva reuni ku miembronan riba e sifranan i resultado finansiero.
Den e kaso aki tabata un resultado positivo apesar di un aña difisil.
Na 2019 ACU mester a sera aña ku un pèrdida komo resultado di e hecho ku e medidanan kontra pandemia a pone ku kompilashon dje sifranan a tarda te terser kuartal di 2020.
Komo resultado di e inseguridat finansiero i ekonomiko ku ta reina den tur sektor, a disidi pa reservá e ganashi pa tempu ku situashon drecha i tin kurpa pa wanta gòlpi.
Aña pasá mester a tuma diferente medida riba tereno di dunamentu di fiansa i atendé seriamente ku miembronan ku tabatin problema ku pago di fiansa pa motibu di Covid i kue un rumbo nobo konsentrá riba un maneho severo di e proseso finansiero i tambe konsentrando riba rekuperashon.
Ademas mester a konverti pèrdida di añanan anterior den ganashi.
Direktiva tabatin komprenshon pa e hecho ku hopi miembro ta konta tradishonalmente riba pago di dividendo manera ta kustumber pero aña pasá Banko Senegal a enfatisá institutonan finansiero pa na lugá di parti ganashi, reserva e plaka pa ora tempunan difisil yega.
Naturalmente e miembronan a keda desepshoná pasobra nan a kustumbrá ku tur aña ta parti ganashi.
Sinembargo teniendo kuenta ku Covid i su konsekuensianan,no tin motibu pa kambia di rumbo i mester sigi un maneho kouteloso.
Den segundo mitar dje aña aki lo tin kampaña interesante pa duna fiansa i ku ta kahera ku nesesidat di miembronan.