Accidente fatal na Cura Cabai Homber a perde su bida y dos otro persona a keda seriamente herida

ORANJESTAD-Diabierna den careda di 2’or di merdia a drenta un informe di un accidente frontal hopi serio pabou di Napa Cura Cabai. Tres persona a resulta herida, den cual un no tabata reaciona mas. E accidente tabata entre un Toyota Yaris di dos porta color geel, y un Suzuki Swift blanco.

Mesora a manda Polis, ambulance y Bombero urgentemente n’e sitio, mirando cu un di e victimanan tabata pega den e auto.

Na yegada Polis a cuminsa sera e caminda pa trafico. Mientras na yegada di ambulance e paramediconan a cuminsa trata e victimanan n’e sitio, hopi lihet nan a ripara cu un di nan no tabata duna señal di bida mas. E prome ambulance hopi lihet a sali direccion di hospital, cu e chauffeur di e Suzuki Swift.

Na yegada di e personal di Bombero, mesora nan a cuminsa corta e Toyota Yaris, p’asina libera e ocupante cu tabata pega den e auto, e chauffeur di e Yaris no tabata duna señal di bida mas. E ocupante tabata un dama. E ocupante di e Yaris tambe a wordo transporta cu maximo urgencia pa hospital. A wordo papia di un accidente frontal, pero riba caminda mes no por a mira ningun marca di brake.

Bomberonan n’e sitio despues di algun rato a libera e dama pasahero di e Yaris geel, mientras a tapa e vehiculo unda e curpa di e chauffeur a keda. Departamento Tecnico di Polis a presenta n’e sitio pa su parti di investigacion. Asina Aruba a conoce un morto di dos di 2021 mas den trafico.

Pa 3:15pm dr. Texier a constata morto di John Davis, naci na Aruba di 57 aña di edad. John Davis, ta biba na Yuwana Morto y ta un mecanico masha popular y conoci. Pa colmo su mihor amigo a muri e siman aki y awe el a hay’e den un accidente pisa y a fayece n’e sitio mes.

Cuerpo Policial Aruba ta manda palabra di profundo condolencia na famia di e fayecido.