Abogado Bijkerk a gana kaso di 620.000 Lira turko kontra kasino lokal Online

WILLEMSTAD. Un turko ku a gana un wega Online na un casino lokal mester a warda 3 aña pa porfin haña perspektiva ku e ta haña su plaka ora abogado Bijkerk a gana e kaso den korte lokal kontra Trigonon Group i Cyberlock N.V. resientemente.
Bijkerk a aktua komo apoderado di Stichting Belangenbehartiging Gedupeerden Online Kansspelen i e nomber mes ta bisa tur kos.
Ta un turko ku a gana i e kompania lokal no kier a pag’e su plaka, a kontrat’é i awor nan tin ku paga pero manera e turko tin miles di hende ku nunka ta kobra nan plaka. E turko a gana 620.000 Lira turko ku ta komo 48.843 dòler merikano i e fundashon SBGOK mester a proba identidat dje turko kende a nase na aña 1977 na Nizip, Turkia.
Pa proba identidat legitimo dje turko e abogado mester a produsi un dokumento di nasementu di e turko.
E abogado a presenta un grabashon di video kaminda por mira un hende ta subi e adrès elektroniko dje persona ganador i un faktura elektroniko pa kompletá e prueba.
En todo kaso e turko a manda un abundansia di prueba di identidat pa e abogado por a hasi su trabou den korte lokal.
Korte a husga ku e dokumentonan ta valido i legal i ku no tabatin chanchuyo den identidat dje persona. A keda sufisientemente probá ku e persona ta e turko ku a nase na aña 1977 na Nizip, Turkia i ku a hunga plaka ne casino online Bahsine dunando e fundashon rason den su demanda.
Asina mes doñonan dje casino a purba bringa e pruebanan reklamando ku e abogado mester a usa e sistema di identifikashon
“Know Your Customer”,”Anti Money Laundering” i “Anti-Terrorist Financing”.
Wes sinembargo a splika ku e argumentonan dje abogado ta valido segun nos Kódigo Sivil i ta sufisiente prueba.
Despues e doñonan di casino a insisti ku mester proba identidat di firmante dje demanda pero korte a splika ku e firma aki ta meskos riba tur dokumento dje turko.
Summa summarum wes a disidi ku e casino debe e turko 620.000 Lira turko i ku doño dje casino Trigonon mester paga. Komo ku doño dje casino no a reklamá ku e mester paga interes, e turko lo haña interes tambe riba e suma.
Komo ku e fundashon SBGOK a kometé algun fayo den e proseso nan mester paga algun gastu dje proseso pero importante ta ku e turko mester haña su ganshi di 620.000 Lira turko.