Abogado a baha bai fakansi Europa….. Lubidá di registrá apelashon kontra sentensia pa su kliente

WILLEMSTAD. Un kaso di un abogado ku a lubidá di registrá apelashon kontra un sentensia pa su kliente pa posiblemente un motibu veridiko pero asina mes kurioso, a pone ku un señora a pèrdè su apelashon “pa default” pasobra su abogado no a bai apelá.
Ta trata di un kaso di 3 aña bieu pero ta awor numa desishon final a kai kaminda kliente dje abogado a keda perhudiká pero asina mes a pleita na fabor dje abogado.
Dia 5 di november 2018 e señora a apelá e sentensia di korte den promé instansia serka Korte di Hustisia di tres wes.
Korte di Hustisia a trata e apelashon dia 19 di november 2020 via video na Kòrsou kaminda tur partido a komunika ku otro i a posponé e kaso pa traté despues na Sint Maarten.
No tabatin diskushon ku e señora a registrá e apelashon lat pasobra su abogado no a hasi esei.
Asina mes kliente dje abogado a pretendé ku por diskulpa e abogado ku e tabata lat i a konta ku dia 17 di september 2018 ela bai Ulanda ku fakansi kaminda ela bin tende ku su mama ta terminalmente malu i a bin fayesé dia 6 di oktober dje mesun aña.
Pa motibu di malesa di mama dje abogado i e hecho ku e no por a kambia su pasashi di retorno na tempu, e abogado no por a atendé su asuntunan di ofisina manera debe ser of laga un hende remplasé.
Opviamente Korte di Hustisia no tabata impreshoná pasobra e abogado a faya fundamentalmente dor di bai Ulanda sin laga hende atendé ku su kasonan koriente.
Komo abogado profeshonal esaki ta inaseptabel ounke ku e por tabata den un estado di emoshon kargá.
Konsekuensia dje fayo aki ta pa kuenta di remplasante dje abogado i Korte a dal porta sera pa sigi trata e kaso.