ABC Busbedrijf ta tuma over kordinashon transporte di skol

WILLEMSTAD (D) – Gobièrnu tei’ enkarga ABC Busbedrijf ku kordinashon di tur transporte pa muchanan ku ta bai skol. Ademas di e kordinashon, ABC Busbedrijf mester tuma tambe kordinashon di tur e personanan ku aktualmente ta transporta muchanan.Ta trata di muchanan ku ta risibi supsidio di gobièrnu, den forma di transporte pa skol. Sithree van Heydoorn a splika ku for di dia ku ela bira minister di enseñansa, ela indiká ku gobièrnu no ta eksperto di transporte. ‘’Nos tarea ta pa wak si e mucha ta bin na remarke pa haña transporte. Nos tin eskperto den tranporte na Kòrsou ku yama ABC Busbedrijf. Mi ta kere ku no tin hende mas mihó ku nan pa kordiná e transporte aki.’’ Den e situashon nobo e minister ta haña man liber ku e por usa e hendenan den su ministerio pa traha riba enseñansa.
E minister a bisa tambe ku no ta e intenshon di gobièrnu pa perhudiká ningun hende. Tin komprenshon pe hecho ku e transporte ta nifika entrada pa e transportistanan. Sinembargo ministerio di enseñansa, debi na e trayekto di VVU, tin skarsedat di personal. Debi na e situashon aki sa resulta ku tin problema pa paga e transportistanan, pasobra no tin hende pa traha riba entre otro e pagonan.

HISTORIKO
Informashon adishonal ku NOBO ta dispone di dje, ta indika ku por konsidera e akuerdo entre gobiernu i ABC Busbedrijf, ku ta drenta na vigor dia 1 di augustus awor, komo algu historiko.Ta algu ku gobiernu tin sigur 25 aña trahando riba dje i ku porfin ta parse di ta logra. Na promé instante gobièrnu a kuminsa baha su gastunan di transporte di skol, den kursonan di añanan. Despues a logra parsialmentge pa organisá e transporte mas mihó. Awor ku tur kos lo pasa den man di ABC Busbedrijf, aspektonan di seguridat i siguransa ku e mucha ta yega skol na tempu, ta garantisá. NOBO tin informashon ku e akuerdo ta nifiká ku ABC Busbedrijf ta haña mas o menos 150 vehikulo adishonal bou di su maneho, ku ta representá transporte di skol pa más ku 2 míl mucha.
E shofurnan di bus ku ta transportá mucha di skol, ta afiliá na Sitek i segun nos informashon awe mainta tabatin un enkuentro entre dje sindikato i gobièrnu pa papia riba e akuerdo nobo.
Ademas di Sitek tabata presente representante di e Asosashon di Busnan grandi ku tambe ta hasi transporte di mucha di skol.