A SALI NA KLA KU JERSON ROSALINA TA METÍ DEN MUCHU MAS KOS

WILLEMSTAD – Segun e investigashon den e kaso di 41 kilo di droga ku e kuarteto a purba pasa via pòst atraves di e negoshi Caribbean Cargo Services (C.C.S.) ta tumando lugá, a sali na kla ku Jerson Rosalina ta metí den muchu mas fechoria, pasobra durante e investigashon ku outoridatnan a hasi na su kas dia 7 di febrüari 2022 a haña 2 plantashi di mariwana konsistiendo di 1066 planchi di henep, anto tambe 4 patronchi skèrpi pa arma di kandela. Rosalina a bisa ku e sa duna e matanan ei awa i ku su intenshon tabata pa bende nan. Mas aleu tambe a haña riba Rosalina su telefon 12 pòtrèt i 6 vidio di pòrno di muchanan menor di edat (muchanan entre 2 pa 13 aña). Pero Rosalina a insistí ku ta lokenan el a haña via di gruponan di amigu ku sa manda whatsapp pe. Rosalina te asina leu no tabatin ningun pasado ku hustisia. Den sala di korte ayera sinembargo e tabatin masha hopi di aklará i manera ta konosí for di un prinsipio el a hasi komo si fuera e no tabata sa di nada, ku e ta inosente, e no konosé un di e akusadonan prinsipal, esta Meyer i ora ku el a hañ’é berdaderamente den pèrtá, konfrontá ku pruebanan kontundente, el a disidí di hasi uzo di su derechi di keda ketu. Abogadonan enkargá ku e defensa, esta señora mr. Atena Sulvaran, señora mr. Alicia Blonk, señor mr. Prevo, señor mr. Lie A Tjam a hasi tur loke tabata na nan alkanse pa hiba un bon defensa, pero wes mr. Verbeek finalmente a yega na e siguiente sentensia: Pa Meyer un kastigu di prizon di 24 luna di kua 6 luna kondishonal i un periodo di prueba di 3 aña, pa Chambers un kastigu di prizon di 25 luna di kua 6 luna kondishonal i un periodo di prueba di 3 aña, pa Jerson Rosalina un kastigu di prizon di 30 luna di kua 6 luna kondishonal i un periodo di prueba di 3 aña, pa Nava un kastigu di prizon di 16 luna di kua 8 luna kondishonal i un periodo di prueba di 3 aña. Pa tur e akusadonan ta konta ku mester deskitá e periodo ku nan a pasa den aresto preventivo.