A pesar di aña eksepshonalmente difisil….. APC a presentá kuenta i relato anual 2020 ku bon sifra i resultado

WILLEMSTAD – Durante un enkuentro entre e presidente di direktiva, direktor i gerensia di Algemeen Pensioenfonds van Curaçao (APC) respektivamente drs. Philip Martis, sra. Evelyn Kruithof-Bor MBA, Sr. Ramiro Griffith MSc. i Minister Javier Silvania, a hasi entregá di e kuenta anual i e relato anual di 2020 di APC.
Ku esaki APC a kumpli ku e eksigensia di e ordenansa ku ta goberna funshonamentu di pa ratifiká tantu e kuenta anual komo e relato anual di e aña anterior promé ku dia 1 di ougùstùs di e aña siguiente i a entregá esaki ofisialmente na Minister.
Den e relato anual banda di duna un raportahe di e sifranan, a mira bèk riba e desaroyonan mas importante, ku a influensiá e fondo di penshun durante 2020.
Aña 2020 ta bai den historia komo un aña eksepshonalmente difísil, kaminda e pandemia di Covid- 19 a dominá i ku tabatin impakto mas ayá riba e ekonomia mundial, Kòrsou no tabata ekskluí for di esaki.
Ekonomia di Kòrsou a konfrontá último añanan retonan grandi i inseguridat persistente relashoná ku
klousura di refineria,
e situashon ekonómiko di Venezuela i e
komunikashon aereo ménos optimal,
e falta di aktividatnan den e sektor di haf ku a trese tiki impulso pa ekonomia di moda ku e isla a konosé masha poko te kasi nada di e kresementu ekonómiko.

Desaroyonan riba e merkado lokal

Na luna di mart 2020 gobiernu a tuma medidanan drakóniko pa evitá un brote di e viro di Covid-19 manera entre otro un “lockdown” di e isla i kasi parálisis di transporte aereo, lokual tabata un gòlpi fuerte pa nos ekonomia ku ya tabata frágil kaba.
A bin un paro abrupto na e sektor floresente di turismo, aktividatnan ekonómiko a para en espera di e desaroyonan relashoná ku e pandemia.
E tumamentu over di e refineria a retrasá (i te ainda no a tuma lugá) debí na e desaroyonan den industrianan petro-kímiko.
Hopi kompania a haña nan obligá ta kita hende for di trabou ku a pone ku e porsentahe di desempleo a oumentá drástikamente.
Debi na e empeoramentu di nos ekonomia, a pone ku institutonan finansiero riba e isla entre otro APC mester a implementá un moratorio riba retenshon i interes pa e aña 2020 pa su relashonnan ku a keda afektá mas tantu i dirèkt den nan maneho di e aktividatnan di nan negoshi.
E moratorio a konta en prinsipio solamente pa 3 luna, pero mirando e sirkunstansianan a alargá esaki te ku fin di desember 2020.