A deskubrí asbest na anterior Van der Valk hotel

WILLEMSTAD – Den algun parti di e hotel antes Van e Valk hotel na Punda, a haña asbest. Prome ku 1994 tabata usa asbest den varios material di konstrukshon i produkto, entre otro elementonan di sèmènt.
Ekspertonan a hasi un investigashon di asbest i nan a indika detayadamente unda tin asbest den e hotel. En general material ku ta kontene asbest no ta peligroso, si lag’e intakto.
Pa elimina e asbest na un manera sigur, un proseso kuidadoso ta nesesario. Ta pesei un kontratista sertifiká, probabelmente na fin di ougustus ta kuminsa elimina e asbest.
Mientrastantu a informa e partidonan involvi dje trabounan ku ta planea pa tuma luga i tambe tokante dje medidanan di prekoushon.
Aktualmente ta hasiendo e preparashonnan pa deshasi dje asbest i ta trahando riba revitalisashon dje lokalidat úniko i tambe historiko aki.
Huntu ku stakeholdernan Algemeen Pensioenfonds ta traha riba un vishon komun ku finalmente mester resulta den un kontribushon positivo na bida i ekonomia di Punda i sobra di Willemstad, segun APC.
APC ta e motor tras dje re-desaroyo di e area ku ta karga nòmber di Waterfort Plaza.