84% di presunan ekstranhero na Colombia ta venesolano

BOGOTA – Segun un estudio realisá pa studiantenan na Universidat Nacional de Bogota pa lokual ta e aña aki so un total di 2.859 ekstranhero a keda enkarselá na Colombia.
Sifranan ku e studiantenan aki a haña di MPA (Migrantenan i Prisioneros del Abandono) ta ku 2.389 (84%) di e presunan ta venesolano.
Mayoria di e estranheronan presu venesolano a haña nan mes den problema di hustisia pa trafikashon di droga, atrako, sekuestro i homisidio.
E venesolanonan aki a keda kondena na entre 2 pa 20 aña di kastigu di prizon.
Mester indika tambe ku entre esnan ku a keda kondena tin un total di 332 muhé venesolano presu na Colombia ku a keda kondena entre 2 pa 12 aña di kastigu di prizon.
Claudia Cárdenas direktor di ONG a bisa ku 1 di kada 8 venesolano ku imigrá na Colombia ta haña nan mes ku problema di hustisia.
E problema ku e presunan ekstranhero enkarselá na Colombia tin ta ku si nan no tin familiar pa trese alimento pa nan ta den problema serio.
Esaki ta debí ku mayoria di e prizonnan na Colombia ta alimentá e prizoneronan solamente dos biaha pa dia.
Prezunan ku tin nan familiarnan na Colombia si por trese alimento pa nan tur dia si esaki mester ta kaso.