Djamars 30 di mart pa 10’or di mainta den katedral di Pietermaai

Lo selebrá esaki únikamente ku pastornan di parokia

Manera ta e kustumber djamars mainta 30 di mart lo tin e Misa Krismal na Katedral di Pietermaai.

Ta trata aki di un selebrashon relashoná direktamente ku Djaweps Santu, pero ku pa rasonnan práktiko, kaminda tur saserdote por partisipá na dje, ta selebr’é riba e promé dianan di Siman Santu. E ta e misa di renobashon di promesanan saserdotal i di bendishon di e zetanan santu ku na final di misa e saserdotenan ta pasa rekohé nan pa hiba nan na nan parokia, for di kua ta atministrá nan p’asina fielnan por risibí e sakramentunan di boutismo, konfirmashon i huntamentu di enfermonan (Santoli).