6 partisipante pa Miss Teenage Globe Curaçao 2022

Willemstad- Queen Making Queens Organization (QMQ Organization) bou di guia di Ayanette Haard- Statia ta anunsiá ofisialmente e 6 partisipantenan ku lo kompetí pa e sertámen hubenil di momentu, Miss Teenage Globe Curaçao 2022.

E 6 partisipantenan ku lo kompetí ta: Eugéneely Florentina, Kedi Jimenez, Heelery Marceli, Nathali Mauricio Seintje, Valerie van Heydoorn i Briëlle van Thijs.
Despues di a pasa e promé fase di informashon i inskripshon, e partisipantenan ofisial a traha huntu ku e tim di produkshon di QMQ Organization, pa graba nan vidio di introdukshon pa pueblo di Kòrsou i tambe saka nan potrètnan ofisial kaminda por vota pa nan via e página di Facebook i Instagram pa asina por elegí ken lo ta Miss Teenage Internet 2022.

Durante e sertámen e partisipantenan lo risibí diferente charla i entrenamentu di “public speaking” i desaroyo personal pa yuda nan prepará nan mes. Tambe lo tin diferente aktividat sosial kaminda por konosé mas i disfrutá di Kòrsou.
E sertámen ta konsistí di dos shou ofisial; e promé ta Miss Press ku lo tuma lugá 12 di yüni próksimo na PWFC i e shou final ku lo tuma lugá 7 di ougùstùs 2022 tambe na PWFC. Pa kumpra karchi pa e eventonan akí por aserká tur partisipante.

Por bishitá e páginanan ofisial di QMQ Organization via di Facebook, Instagram i Tik Tok pa asina apoyá nos partisipantenan i sigui tur e eksperensianan.