5 polis a keda detené pa asesinato di un hòmber pretu na Memphis

TENNESSEE – Cerelyn Davis kapitan i hefe di kuerpo polisial na Memphis a konfirmá ku tin 5 agente polisial ku a keda detené e siman aki i ku ta bou di investigashon pa morto di un hòmber pretu.
Kapitan Cerelyn Davis a splika ku e biaha aki ta trata di 5 agente polisial pretu ku a maltratá un hòmber pretu identifiká komo Tyre Nichols di 29 aña di edat.
Lokual ku por a opservá di e kamara di seguridat ku kada polis tabatin aktivá ta ku e 5 agentenan polisial a saka Tyre Nichols for di su outo i batié ku skòp di moket’é te na momentu ku e no tabata move mas.
Kapitan Cerelyn Davis a bisa ku lokual a pasa aki a pone ku ela ordená detenshon inmediato di tur e 5 agentenan bou di kargonan kriminal.
Esaki ta nifiká ku si nan keda kondena kada unu lo por keda kondena na kastigu di bida largu den prizon.
Lokual ku e hefe di polis na Tennessee ta pidi esnan ku ta bai manifestá pa hasi esaki pasifikamente.