5 persona impliká ku asesinato di fiskal Paraguayo a keda transladá pa Cartagena

BOGOTA – Francisco Barbosa fiskal general na Colombia a konfirmá ku despues di 25 dia ku tabatin e kaso di asesinato di fiskal Paraguayo Marcelo Pecci na Cartagena de India a logra detené 5 sikario na Medellin.
Komo ku e krímen a tuma lugá na Cartagena mester a transportá e 5 sikarionan aki bek pa rekonstrukshon i tratamentu di e kaso den korte.
Den oranan trempan di mainta un avion a yega for di Medellin pa aeropuerto José María Córdova de Rionegro na Cartagena.
Aki 20 outo blindá i 30 militar riba motersaikel a bai buska e sikarionan pa transportá nan pa prizon na Cartagena.
Ta trata aki di 4 Colombiano i 1 venesolano ku ta esnan impliká den e kaso di asesinato di fiskal Marcelo Pecci
ku a keda asesiná dia 10 di Mei durante su luna de miel na Cartagena de Indias.
E sikarionan aki lo por konta ku nan lo bai haña bastante aña di kastigu di prizon pa lokual nan a hasi di asesiná un fiskal anti Mafia di Paraguay.