5 forma di resa

Orashon ta trata di amor ku esun ku stima nos
Pa: Pader Sebastián Rodríguez, LC | Fuente: elblogdelafe.com

“Orashon ta trata di amor ku esun ku ta stima nos” (Sta. Teresa), e ta buska Esun ku ta buska nos. Ora Hesus ta bisa Pedro: “Simon, bo ta drumi anto?, Bo no por a keda ni sikiera un ora lantá?” (Mk 14,37), nos por konfirmá ku Kristu ta buska nos, ta toka na porta di nos kurason i ta spera ju nos ta papia kunÉ. Nan ta palabranan ku ta “suave den su sonido, pero ta penetrá manera un angel di un abeha” (Sto. Tomás Moro). Kon ta posibel ku Pedro, su apòstel, su gran amigu, e promé Papa a drumi dilanti e doló i sufrimentu di Kristu oranan promé di e Pashon? Hesus no ta buska nada pÉ, E ta pensa únikamente den e bon di Pedro i ta konseh’é: “boso mester keda lantá i resa pa boso no kai den tentashon”.

E benefisionan di orashon ta hopi. E ta uni nos mas na Dios, e ta yuda nos na konos’é i por lo tantu, na stim’É mas. E ta yuda nos na skuch’é i mira kua ta e boluntat di djE pa nos. Ora ami ta papia di boluntat di Dios mi no referí únikamente na loke E pa nos ta, sino loke Dios ke ku nos ta hasi den kada momento. Orashon ta tuma desishonnan ku Dios. E ta manera ora nos ta aseka un amigu pa pidié konsehonan ora nos no sa kon reakshoná òf disidí dilanti un problema o akontesimentu.

Kiko Dios ke di mi?, kiko E ke di esaki?, kon E ke pa ami reakshoná, kiko E ke pa mi hasi?, Orashon tambe ta yuda nos pa nos lòs nos mes for di kosnan material i enfoká nos mirada den lo sobrenatural (lo úniko nesesario pa felisidat). Tambe e ta yuda nos na pensa, aktua i stima mas na kon Dios ta pensa, aktua i stima. Nos ta mira tur esaki reflehá den Maria, nos mama. E ta aseptá ser mama di Dios den orashon i ta kapas di pone su mes den su mannan: “laga sosodé ku mi loke bo a bisa” (Lk 1).
Ora e ta bisa esaki e no tin un futuro kla, e no sa kiko ta bai pasa ni kon tur loke e angel a anunsiá na dje lo sosodé, pero e, muhé di orashon, ta konfia den Dios i ta lansa ku gran konfiansa un sí di amor i dispuesto na kumpli loke Dios ta pidié.

Den orashon kristian nos ta haña 5 forma di hasi orashon.
Tin e orashon di Bendishon, ku ta pidi Dios pa E yena nos ku grasia. Tur bendishon ta prosedé di Dios. Un tata di famia por hasi e señal di krus riba frenta di su yu. Dios ta mira e gesto akí i ta bendishon’é. Pero e saserdote, danki na su ministerio, ta bendishoná klaramente den nòmber di Hesus.

Otro forma di orashon ta Adorashon, esta rekonosé humildemente e Todopoderoso. Ora nos ta adorá Dios nos ta realisá di su poder, grandesa i santidat.
Tambe nos tin e orashon di Petishon, ku kua nos ta roga Dios pa e kosnan ku nos mester. Nos sa ku E sa tur kos, pero di igual forma E ke pa nos pidie ku insistensia, ku fe i di ta habri na loke Dios ta mira mihó pa nos. Por ehemplo, Dios a mira i tabata sa kon su pueblo Israel tabata sufri den desierto, pero E no a aktua promé di a skucha e gritu di su pueblo. Gritu ku ta nifiká orashon, petishon, aklamashon na Dios.
Otro tipo di orashon di petishon ta esun di interseshon. Resa pa otronan. Laga nos kòrda tur dia pa gana grasianan i pidi pa esnan rondó di nos. Ora nos ta mira un aksidente, por ehemplo, mi ta resa pa pronto rekuperashon di e víktima? Ora mi mira un persona ta pidiendo limosna, mi ta resa pe? Ora mi mira un persona ku ta ofendé Kristu, mi ta resa? Òf mi ta kontentá mi mes ku husg’é internamente?
Otro orashon ta e Akshon di yama danki. Manera San Pablo lo a bisa: bo tin algu ku bo no risibí? Tur loke nos tin nos a risibié di Dios. Nos por pensa ku tin kosnan ku nos tin danki na nos esfuerso, ta klaru, pero ken a duna nos e boluntat pa nos hasi esfuerso?, ken a duna nos mannan, pianan, inteligensia, pa haña loke nos ta deseá? Gradisí Dios ta nifiká stima i ser humilde ora nos realisá ku nos ta su kriatura.
I por último, tin e orashon di Alabansa. Nos sa ku Dios no tin mester di aplouso, pero nos sí mester rekonos’é komo Dios. Nos mester demostrá nos alegria di ta yunan di Dios.

Nos ta invitá den e periodo aki pa reforsá nos orashon ku Dios, nos diálogo kunÉ. Laga nos siña sa na “pasa tempu ku Dios”, pa reservá tempu pa orashon kada dia. Ta difísil kere esaki na inisio i únikamente ta konfirm’é ora ta realis’é, pero ora nos ta kapas di bai den Adorashon 30 minüt kada dia, apesar di trabou ku nos tin, e okupá ku un persona por ta p’asina hasi kosnan, Dios no ta stòp di bendishoná. Laga nos bai den orashon pa pidi Dios su bendishon, pa ador’é, pa pidié loke nos mester, pa pidi pa otronan, pa yam’é dank i pa alab’é. Ora nos ta kapas pa traha tempu liber pa esaki kada dia nos ta biba muchu mas trankil, mas trankil i sin duda, ta bai nos mihó.