Raymond, “Moonchi” Rovina:
“Training duru no ta mata niun hende”…
“Mi deseo tabata pa a bai hunga den Jong Colombia”, na palabra e gran eks futbolista Raymond, “Moonchi” Rovina. “Moonchi” su Mama ta di Boka San Michiel i for di edat hóben e tabata bai Boka San Michiel keda drumi i hunga futbòl.
E tabatin hopi primu na Boka San Michiel i ta kòrda ku e tabata yega hopi tempran pa por haña wega. Sinembargo el a haña desepshon pasó Queño a yega di bisa ku e no ta kompleto di Boka San Michiel. I esei a pone ku el a tuma e desishon di no hunga pa e tim ku e kier a bai ku ta Jong Colombia.
“Un biaha nos a gana, ora m’a pensa ku mi ta hunga a tene mi for di wega pasó mi tabata mitar di Boka San Michiel”, e eks estrea ta rekordá.
Tambe siendo mucha di Mundu Nobo e tabata hopi serka di hunga pa Jong Holland. Hopi di su amigunan tabata ku e trikolornan. Rovina a konta ku el a yega di train ku Subt.
Canword mes a hib’é kas, pero su Mama a rabia pasó 8’or a bati i e mester tabata na kas 8or. Subt tabata kla pa trese papel pa el a firma, pero esei a pone ku Sithoc a kai aden.
El a firma ku Sithoc ku 17 aña. Sithoc ta tim di su Tata Sixto, i tambe naturalmente su rumannan “Djun Djun” i Ton. “Moonchi” ta konta ku “Djun Djun” su ruman tabata klase aparte e tabata stima train.
Djun Djun semper tabata protehá “Moonchi” i tabata bisa ku si nan dal “Moonchi” e ta den problema. Rovina a forma parti dje elenco hopi eksitoso di Sithoc di 1986 te 1994.
E tim di Neto i “Nooi”.
El a konta di e union di Sithoc. Fuera di hunga futbòl nan tabata bai tur kaminda huntu. Sithoc tabatin 24 aña sin bira kampeon.
E ta kòrda kon Aniceta a bin bou di lata pa kue pinalti. “Sithoc tabata bon tim ku Hensley Ignacio bou di lata. Hensley tabata inspirá konfiansa i tabata bisa pa laga e hungadónan tira pasó e ta kue e bala”, Raymond ta añadí. Sithoc tabatin problema kontra timnan manera Vesta i tabata gana esnan mas fuerte.
Rovina ta rekordá tremendo tempu den nos futbòl. Tur tim tabatin algun bon futbolista. Den kasi tur tim tin un duo ku bo mester a tene kuenta kuné den atake. “Moonchi” ta hopi serka di Sithoc. E ta splika ku el a sera bon amistat ku Yuyu Bruncard. Tambe Sithoc veterano ta sostené Sithoc I.
E eks estrea ta bisa ku semper el a gusta train.
E tabata kore di Sharo bai Muizenberg.
“Training no ta mata niun hende”, el a deklará.