21 DI OUGÙSTÙS: DIA DI TRANSPORTE PÙBLIKÓ

Willemstad – Gobièrnu di Kòrsou na 2017, a deklará e di tres djadumingu di e luna di ougùstùs komo Dia di Transporte Públiko. E aña aki dia di Transporte Públiko a kai riba djadumingu 21 di ougùstùs 2022.
Riba e djadumingu aki, a para ketu na e importansia di tur shofùr den transporte públiko, pa ku nan responsabilidat pa transportá tur suidadano ku e diligensha, seguridat i efisiensia nesesario.
Transporte públiko ta un medio hopi importante den nos komunidat i ta yuda e suidadano pa yega fásilmente na su destino, manera entre otro skol, trabou i kas. Tambe pa e suidadano por rekreá.
Dia di Transporte Públiko ta netamente pa para ketu un ratu na e henter e sektor di transporte, su desaroyo, su defisiensia, retonan i plannan pa futuro.
Nos Transporte Públiko a bin ta pasa den diferente desaroyo ku e meta pa duna e usuario un transporte públiko mas optimal posibel.
Ainda no a logra yega e meta, pero Minister Charles Cooper ta konvensí ku huntu nos por yega na e transporte públiko konfiabel, efisiente i pagabel ku komunidat meresé.
Den koperashon mutuo lo por surpasá tur opstákulo i logra é transporte públiko pa pais Kòrsou.
Minister di VVRP Charles Cooper huntu ku Servisio pa Tráfiko i Transporte (UOVV) a felisitá tur ku ta laborá den e sektor di Transporte Públiko ku e dia aki i ta deseá nan forsa i sabiduria.
Na e okashon aki, a tene un Santu Sakrifisio di Misa na Misa di Wèstpùnt.