2023 lo bira aña di EMPOBRESIMENTU!

WILLEMSTAD – “Fomentá konfiansa, koperashon i resilensia” ta título di e informe anual 2021 di Konseho Sosial Ekonómiko (SER) ku a ser presentá ayera na Gobièrnu.
E informe anual ta duna un relato di aña 2021 ku sigun SER “tabata un aña ku den vários sentido tabata unu difísil i partikularmente vulnerabel”.
Sigun SER, despues di e aña duru di e vírus di Corona (2020), e di dos semèster di 2021, a kuminsá demostrá señalnan alentador.
Tabatin un kresementu spektakular di turismo di estadia i un kresementu den sektor di informashon i komunikashon.
Proyektonan di konstrukshon tabata indiká un rekuperashon aselerá pero tòg e poblashon ku ta traha i produktividat laboral a sigui baha durante e periodo.
Emigrashon pa otro pais tambe a oumenta.
SER ta premirá ku e tendensia aki lo kontinuá debí na último desaroyonan mundial i ku e nivel empleo lo no yega na nivelnan pre-pandémiko te ku aña 2023.
Tampoko SER premirá ku ekonomia lo rekuperá na nivelnan di promé ku e krísis di COVID-19. Por lo tantu, ku e tasa di empleo aktual, pais lo generá menos entrada pa kubri nos gastunan.