16 AÑA KASTIGU DI PRIZON, KITANDO E PERIODO PASÁ DEN ARESTO PREVENTIVO PA AGENTE POLISIAL MARIENS MARIANO

WILLEMSTAD. Loke ta kore manera un linia kòrá den e rekisitorio di e duo di fiskalnan ta e menshon ku a keda hasí di e inmenso daño ku Kuerpo Polisial a sufri na kredibilidat i konfiansa. Ladronisia di droga for di warda di polis?
Esaki ta un tópiko sumamente kargá ku apsolutamente no ta un suseso ku por ferwagt tuma lugá den un organisashon asina ei. Den un otro kombersashon na kua Bautisma a partisipá i ku fiskal a sita, a papia di e kilonan di droga di Norbert ku a keda saká for di warda di polis.
Norbert klaramente tabatin su hendenan den kuerpo di polis ku a sòru pa e kiebro den warda di polis tuma lugá, hasiendo uzo di material pisá, entre kua un skèr hidrouliko, hòrtá for di Brantwer. Un dokumento ku ta resumí un kòmbersashon entre Ignacio i Rehuel tambe ta papia di Mariano. Tabatin papiá ku Mariano mes tabata trese droga na tera. Over di e karga riba laman a keda bisá ku esaki a keda interseptá i ku a gara tantu Leo komo Papito i ku Mariano pa e karga di droga ei ya a keda pagá.
Intersepshon di e droga aki tabata rason pa agente polisial Mariano hasi tur loke ta posibel pa saka e droga for di warda di polis di manera ku e hendenan ku a paga kaba por haña e parti ku ta toka nan. Pero asina a sosodé tambe ku Mariano mes a keda ku un parti di e droga. Ademas a konkluí ku agente polisial Mariano ta e ‘brain’ tras di e ladronisia for di warda di polis.
Esnan ku a saka e droga for di warda di polis ta miembronan di e banda kriminal Army, kendenan a demostrá klaramente di no ta bèk pa nada, komo tal a hasi uzo di e material pisá hòrtá for di Brantwer.
E kastigu di prizon ku fiskal a demandá pa e brain tras di e ladronisia di droga fo’i warda di polis, esta agente polisial Mariens Mingelangel Mariano, a tene kuenta ku ta trata aki di un agente polisial ku tabatin e kurashi pa kibra drenta den warda di polis, kaminda e mes ta traha, kousando un daño inmenso na e nòmber i imágen di kuerpo polisial.
E kastigu demandá ta 16 aña di prizon, kitando e periodo pasá den aresto preventivo. A keda awor únikamente pa wes mr. G. Verbeek dikta sentensia, teniendo alabes kuenta ku e defensa hibá pa abogado señora mr. Atena Sulvaran.