Rumannan e nesesidat di kambionan riguroso ta grandi na Kòrsou aktualmente, anto nos mester kuminsá práktikamente di nobo. Pero ku boluntat di Dios! Loke mester drecha no ta sinta únikamente den polítika i gobernashon, nos mester ke tuma tur asuntu importante na konsiderashon. Loke ta fayando ku Kòrsou ta algun faktor masha esensial mes, ku ta dirèkt relashoná ku komportashon en general. E krísis di Covid 19 a kontribuí pa habri tur hende su bista pa sa di e enorme pobresa ku ta reina den kasnan di famia, esei ke men ku barionan kompletu ta den mizeria i situashonnan sosial deplorabel. Pobresa tur tempu tabata teribel na Kòrsou, pasobra e tin di haber ku e manera kon nos ta balorá otro. Pero, ku e krísis di Covid 19 ku a okashoná seramentu di kantidat di empresa, limitando entradanan di kasi tur hende debí na pèrdèmentu di trabou, tur siudadano ku realmente tin un konsenshi sano, a haña chèns di mira i komprondé presis kon nos ta biba en realidat riba e isla aki. E situashon aktual ta unu pa hasi tur hende pensa i reflekshoná. No tin sentido pa dal bai manera tabata tur tempu. T’esaki ta e momento pa kambio, t’esaki ta e chènsnan di oro pa probechá di dje pa duna Kòrsou un kompletamente otro buèlta. Ta nos sistema en general, nos manera di anda ku otro, ta eseinan mester drecha. Un kas di famia por ta na òrdu si tin rèspèt, dedikashon, sentido di responsabilidat sufisiente entre e habitantenan di e kas. Mester biba den harmonia. Un empresa por hasi ganashi i pèrkurá pa sigui funshoná riba un base duradero si trahadó i dunadó di trabou ta atendé otro ku sinseridat. Nos por! Rèspèt entre trahadó i dunadó di trabou ta e fundeshi pa sigui konstruí ariba. Pero, den un gran kantidat di kasnan di famia aki na Kòrsou for di mainta trempan ta lanta ku zundra i ofendé otro. Ta sirkunstansianan teribel nos ta papia di dje aki! Dikon ta asina? Ta e prinsipionan ta robes, e puntonan di salida pa enfrentá bida no ta korekto. Si tuma nota di loke ta pasa den polítika i gobernashon pa vários dékada aki na Kòrsou. Den polítika ta masha normal ku durante debatenan den Parlamento, ta puru konflikto ta drif riba dje. No ta konsentrá riba kalidat ni kontenido. Mayoria biaha ta pa eksponé diferensianan di opinion, mustra ku algu no por òf ku e inisiativa ta robes. Anto no lubidá periodismo, esta korant, radio-emisoranan, den programanan spesial, kasi semper e impakto final ta unu devastador, esta yenando den kurason di nos hendenan sufrimentu, sentido di rabia i desepshon. Awendia a bini aserka ‘fake news’ via whatsapp i facebook. Rumannan, den nòmber di Dios, ban hasi e kosnan otro, ban konsentrá riba hasi e kosnan korekto, hustu i ku e boluntat pa ta eksitoso den sirbi e totalidat aki pa nos por tin un bida útil. Kòrsou tin oportunidatnan di oro pa progresá di diferente manera. Ta komo si fuera ainda nos no ta konsiente di e papel importante ku nos kada un por hunga den e mundu aki. Ami ke pa for di parlamento i gobièrnu sali e inisiativa pa kambio. Ohalá for di parlamento i gobièrnu start sali ku un proseso di transformashon di Kòrsou. No ta plaka ta disidí, sino e deseo i anhelo pa logra una bes ku nos tur ta konsiente ku di e forma aktual no por sigui.