11 venesolano detené na aeropuerto di Panama ku Visa falsifiká pa drenta Europa

PANAMA – Un grupo di 11 siudadano venesolano entre nan 4 menor di edat a keda detené pa inspektornan di inmigrashon di Panama na momentu ku a komprobá ku tur tabatin pasaporte ku Visa falsifiká pa drenta Union Europeo.
E 11 venesolanonan aki aparentemente tabatin e Visa Schengen ku nan por biaha sin ningun problema na tur pais den Union Europeo.
Na momentu ku un persona tin un pasaporte ku tin un Visa Schengen esaki ta nifiká ku e persona por drenta Alemania, Oustria, Bèlgika, Repúblika Cheka, Dinamarka, Eslovenia, Eslovakia, Spaña, Estonia, Finlandia, Fransia, Gresia, Hungria, Island, Italia, Letonia, Liechtenstein, Lituania, Luxemburg, Malta, Noruega, Hulanda, Polonia, Portugal, Suesia i Suisa.
E grupo di 11 venesolanonan aki tabatin plan pa sigi riba un buelo rumbo pa Mexico i posiblemente nan lo a keda usa komo mula pa transportá ku droga pa kualkier pais den kontinente Europeo.